الكلمة الطيبة صدقة - للشاعرة/ زيزي الششتاوي

إنتي قوية لأنك بتقدري تسامحي، شجاعة لأنك بتعرفي تواجهي الأذي وتتجاهلي السيء.. ووقت الغضب مبتغلطيش وتجرحيهم. ماتزعليش إنك من الناس اللي بتسامح أو بتعرفي تجبري الخاطر، إنتي بقا اللي ربنا قال عنهم "والكاظمين الغيظ والعافين عن الناس" فحتى لو مالقيتيش ناس شبهك دلوقتي، هتلاقيهم بعدين. ولو مالقيتيش حد خالص فإنتي عند ربنا الأحسن انتصر على غصة قلبك اللي بتألمك. القوى بس هو اللي بيواجه الأقدار بابتسامة. رضاك بحكم ربنا قوة.. اقتناعك إن حياتك اللي عايشها دلوقتي ووجود الناس دي في حياتك شيء مكتوب لا مفر منه قوة. سكوتك أدام الكلام اللي بيأذيك وتجاهل المشاكل قوة..

الضعف هو اللي هيخليك تركز فالمشاكل والحاجات اللي بتضايقك وشيطانك يسيطر على تفكيرك ومتشوفش النعم اللي ربنا أنعم عليك بيها. اتأكد إن اللي إنت فيه ده أحسن حاجة ليك وإن قدرك ده مكتوب، وامتحان ليك. حاول تنجح في الامتحان..

جبر الخواطر ده حلو أوي ومش أي حد عنده القدرة دي زي إن مش أي حد يعرف يطبق حديث الرسول صلى الله عليه وسلم (الكلمة الطيبة صدقة)..

إنك يكون عندك المقدرة أن تكون سبب لسعادة شخص فده من رضا ربنا عليك. فلما تلاقي نفسك عمال تكسر بخاطر الناس اللي حواليك وتتسبب في أذى مشاعرهم، اعرف إن ربنا مش راضي عنك وبيبعد عنك الصدقات والحسنات اللي مش هتكلفك حاجة، اللي كل بنى آدم بيتشعبط فيها عشان لما يقابله يكون رصيده في قلوب الناس أثر جميل.

زيزي الششتاوي،

احصل على الكتاب